ஈரோட்டில் சின்னமாரியம்மன் கோயில் தேரோட்டம் - திரளான பக்தர்கள் வடம் பிடித்து இழுத்தனர்

ஈரோட்டில் பிரசித்தி பெற்ற பெரிய மாரியம்மன் கோயில் மற்றும் சின்ன மாரியம்மன், காரைவாய்க்கால் மாரியம்மன் ஆகிய கோவில்களில் குண்டம் தேர்த்திருவிழா கடந்த 15ம் தேதி பூச்சாட்டுதலுடன் தொடங்கியது. கடந்த 19ம் தேதி மூன்று கோவில்களிலும் கம்பங்கள் நடப்பட்டன. இதைத்தொடர்ந்து தினமும் பெண்கள் கம்பங்களுக்கு புனிதநீர் ஊற்றி அம்மனை வழிபட்டு வருகின்றனர். நேற்று காரை வாய்க்கால் மாரியம்மன் கோயிலில் குண்டம் விழா நடந்தது. இதில் பக்தர்கள் தீ மிதித்து வேண்டுதலை நிறைவேற்றினார்கள். பெரிய மாரியம்மன் கோயிலில் நேற்று இரவு மாவிளக்கு பூஜை நடந்தது. பின்னர் பெரிய மாரியம்மனின் திருவீதி உலா நடைபெற்றது. சின்ன மாரியம்மன் கோவில் தேரோட்டம் நடைபெற்றது. முன்னதாக அலங்கரிக்கப்பட்ட தேர் கோவிலுக்கு அருகில் தயாராக நிறுத்தப்பட்டு அம்மன் எழுந்தருளள், சிறப்பு பூஜை, திருஷ்டி பூஜை முடிந்த பின்பு, டவுன் டிஎஸ்பி ஆனந்தகுமார், இன்ஸ்பெக்டர் தேவராஜ், முன்னாள் எம்.எல்.ஏ. கே.எஸ் தென்னரசு ஆகியோருடன் பக்தர்கள் வடம் பிடித்து தேரை இழுத்தனர். தேர், பெரியார் வீதி, அக்ரஹாரம் வீதி வழியாக தேர் சென்றபோது இருபுறமும் பக்தர்கள் திரண்டு நின்று வழிபட்டனர். வெயில் தாக்கத்தை குறைக்கும் வகையில் தேரை இழுப்பவர்கள் மீது மஞ்சள் நீர் தெளிக்கப்பட்டது. மேலும் முன்னெச்சரிக்கை நடவடிக்கையாக அந்த பகுதியில் மின் நிறுத்தம் செய்யப் பட்டிருந்தது.

பின்னர் அக்ரஹாரம் வீதியில் தேர் நிறுத்தப்பட்டது.31.03.2022 மாலை, 4 மணிக்கு, மீண்டும் தேர்வடம் பிடித்து இழுக்கப்பட்டு கச்சேரி வீதியில் நிறுத்தப்படுகிறது. 1ம் தேதி மாலை 4 மணிக்கு மீண்டும் தேர் இழுக்கப்பட்டு சின்ன மாரியம்மன் கோவிலில் நிலை வந்தடைகிறது. இரவு சின்ன மாரியம்மனின் திருவீதி உலாவும், காரை வாய்க்கால் மாரியம்மனின் திருவீதி உலாவும் நடக்கிறது. ஏப்ரல் 2ம் தேதி(சனிக்கிழமை) மாலை 3மணிக்கு கம்பங்களின் ஊர்வலம் நடக்கிறது. இதில், மூன்று கோயில்களிலும் நடப்பட்டு உள்ள கம்பங்கள் பிடுங்கப்பட்டு முக்கிய வீதியில் வழியாக ஊர்வலமாக சென்று ஆற்றில் விடப்படுகிறது. அப்போது மஞ்சள் நீராட்டு விழா நடைபெறுவதால் பக்தர்கள் ஒருவர் மீது ஒருவர் மஞ்சள் நீரை ஊற்றி மகிழ்வார்கள். வரும் 3ம் தேதி காலை 10.30 மணிக்கு மறுபூஜையுடன் திருவிழா நிறைவடைகிறது.