தூக்கநாயக்கன்பாளையம் பகுதியில் வளர்ச்சிப் பணிகளை மாவட்ட ஆட்சியர் ஆய்வு......

 

ஈரோடு மாவட்டம், தூக்கநாயக்கன்பாளையம் ஊராட்சி ஒன்றியத்திற்குட்பட்ட பெருமுகை, தொட்டகோம்பை, கணக்கம்பாளையம் உள்ளிட்ட பகுதிகளில் நடைபெற்று வரும் பல்வேறு வளர்ச்சித் திட்டப் பணிகளை மாவட்ட ஆட்சித்தலைவர் கந்தசாமி அவர்கள் 18.08.2026 இன்று நேரில் பார்வையிட்டு ஆய்வு மேற்கொண்டார்.

பெருமுகை ஊராட்சி, சைபன்புதூர் பகுதியில் VPG ராம்ஜி திட்டத்தின் கீழ் ரூ.17.35 லட்சம் மதிப்பீட்டில் 14,250 மரக்கன்றுகள் உற்பத்தி செய்யும் வகையில் அமைக்கப்பட்டுள்ள நாற்றங்கால் பண்ணையை பார்வையிட்ட மாவட்ட ஆட்சியர், அங்கு உற்பத்தி செய்யப்படும் மரக்கன்றுகளின் வகைகள், எண்ணிக்கை, உற்பத்தி முறை மற்றும் பராமரிப்புப் பணிகள் குறித்து கேட்டறிந்தார். தொடர்ந்து, திடக்கழிவு மேலாண்மைத் திட்டத்தின் கீழ் மண்புழு உரம் தயாரிக்கும் பணிகளையும் பார்வையிட்டு, மூலப்பொருட்கள், தினசரி உற்பத்தி அளவு, தயாரிப்பு முறை, உரத்தின் தரம் மற்றும் விவசாயிகளுக்கு உரம் வழங்கப்படுவது குறித்து ஆய்வு செய்தார்.

தொட்டகோம்பை பகுதியில் ரூ.4.10 லட்சம் மதிப்பீட்டில் நடைபெற்று வரும் தடுப்புச்சுவர் அமைக்கும் பணியையும், தொட்டகோம்பை மற்றும் பெருமுகை பகுதிகளில் ரூ.20 லட்சம் மதிப்பீட்டில் புதிதாக கட்டப்பட்டு வரும் சேமிப்புக் கிடங்கின் கட்டுமானப் பணிகளையும் மாவட்ட ஆட்சியர் ஆய்வு செய்தார்.

தொட்டகோம்பை ஊராட்சி ஒன்றிய தொடக்கப்பள்ளியில் தொடுதிரை மூலம் மாணவ, மாணவியர்களுக்கு பாடங்கள் நடத்தப்படுவதை பார்வையிட்ட அவர், மாணவர்களின் கற்றல் திறன் குறித்தும் ஆய்வு மேற்கொண்டார். மேலும், மாணவர்களுக்கு வழங்கப்படும் சத்துணவை சாப்பிட்டு பார்த்து, உணவின் சுவை மற்றும் உணவுப் பட்டியலின்படி உணவு வழங்கப்படுகிறதா என்பதையும் கேட்டறிந்தார். பள்ளியில் வகுப்பறை, சுத்திகரிக்கப்பட்ட குடிநீர் மற்றும் கழிப்பறை உள்ளிட்ட அடிப்படை வசதிகளையும் ஆய்வு செய்தார்.

பெருமுகை ஊராட்சி கரும்பாறை பகுதியில் உள்ள மேல்நிலை நீர்த்தேக்கத் தொட்டியை பார்வையிட்டு, குளோரினேஷன் செய்யப்படும் நாள் மற்றும் நேரத்திற்கு குடிநீர் முறையாக வழங்கப்படுவது உள்ளிட்ட பணிகளின் முன்னேற்றத்தையும் ஆய்வு செய்தார். மேலும், தேசிய தோட்டக்கலை இயக்கம் திட்டத்தின் கீழ் ரூ.25,000 மானியத்தில் விவசாயி திரு.சக்திவேல் அவர்களின் வேளாண் நிலத்தில் அமைக்கப்பட்டுள்ள நீர் சேகரிக்கும் கட்டமைப்பை பார்வையிட்டு, நீர்ப்பாசன வசதிகள், நீர் சேகரிப்பு நாட்கள் மற்றும் பாசனத்திற்கு நீர் எடுக்கும் முறைகள் குறித்து விவசாயியிடம் கேட்டறிந்தார். 

கணக்கம்பாளையம் கிராம நிர்வாக அலுவலகத்தில் ஆய்வு மேற்கொண்ட மாவட்ட ஆட்சியர், அப்பகுதியில் செயல்படும் நியாயவிலைக் கடையில் பயோமெட்ரிக் கருவியின் செயல்பாடு, அத்தியாவசியப் பொருட்களின் இருப்பு, குடும்ப அட்டைதாரர்கள் பொருட்கள் வாங்கிய விவரங்கள், பொதுவிநியோகப் பொருட்களின் இருப்பு மற்றும் விற்பனை விவரங்கள் உள்ளிட்டவற்றை ஆய்வு செய்தார். மேலும், கடையின் செயல்பாட்டு நேரம், விடுமுறை நாட்கள் மற்றும் பராமரிக்கப்படும் பதிவேடுகளையும் பார்வையிட்டார்.

தொடர்ந்து, கோபிசெட்டிபாளையம் வட்டம், கணக்கம்பாளையம் பகுதியில் 16-வது மக்கள் தொகை கணக்கெடுப்பு–2027 திட்டத்தின் கீழ் நடைபெற்று வரும் வீடுகள் கணக்கெடுப்பு பணிகளை பார்வையிட்டு, கணக்கெடுப்பு தொடர்பான விவரங்கள் முறையாக பதிவு செய்யப்படுகிறதா என்பது குறித்து அலுவலர்களிடம் கேட்டறிந்தார்.

தூக்கநாயக்கன்பாளையத்தில் பெருந்தலைவர் காமராஜர் காலை உணவுத் திட்டத்தின் கீழ் 6 முதல் 8-ஆம் வகுப்பு வரை பயிலும் மாணவர்களுக்கும் திட்டம் விரிவுபடுத்தப்பட உள்ள நிலையில், புதிதாக தேர்வுபெற்ற பள்ளி மையப் பொறுப்பாளர்களுக்காக நடைபெற்று வரும் சமையல் பயிற்சியை மாவட்ட ஆட்சியர் தொடங்கி வைத்து, அவர்கள் தயாரித்த உணவை சாப்பிட்டு உணவின் தரம் மற்றும் சுவையை ஆய்வு செய்தார். மேலும், உணவு தயாரிக்கும் முறை, உணவுப் பட்டியல் மற்றும் குழந்தைகளுக்கு உணவு வழங்கும் நேரம் குறித்தும் பயிற்சி பெறும் பொறுப்பாளர்களிடம் கேட்டறிந்தார்.

இந்த ஆய்வின்போது கோபிசெட்டிபாளையம் வருவாய் வட்டாட்சியர் குமரேசன், தூக்கநாயக்கன்பாளையம் வட்டார வளர்ச்சி அலுவலர்கள் பிரேம்குமார், கதிரேசன், துணை வட்டாட்சியர் செந்தில்குமார், தமிழ்நாடு ஊரக வாழ்வாதார இயக்க உதவி திட்ட அலுவலர் பெருமாள், உதவி பொறியாளர் கருணாகரன் உள்ளிட்ட துறை சார்ந்த அலுவலர்கள் கலந்து கொண்டனர்.